Tar leiarposisjon i det grøne skiftet

Øygarden har lange tradisjonar og kultur for å byggja opp industri og er eit kjerneområde for satsingar i det grøne skiftet.

– Vi har alle føresetnader for å verta eit nasjonal og internasjonalt senter for å realisera denne nødvendige omstillinga, seier ordførar Tom Georg Indrevik (H).

Tom Georg Indrevik (H)

Ordførar, Øygarden kommune

Det vert investert fleire titals milliardar i olje- og gasskommunen Øygarden. Den 1. juni 2027 skal eit nytt sotrasamband til 23 milliardar kroner stå klar til bruk. I Energiparken vert det grøne skiftet med mottak og lagring av CO2 og hydrogenproduksjon realisert. Om nokre år skal ei ny felles godshamn for bergensregionen takast i bruk på Ågotnes.

– Alt dette skjer i Øygarden. Delegasjonar frå inn og utland kjem til oss for å få kunnskap om gjennomføringa av det grøne skiftet. Vi heiar på aktørane som satsar tungt på dette. Det er tradisjon og kultur for å satsa på industri i kommunen, seier ordføraren.

Sterk vekst i Øygarden

I dei siste tiåra har det vore sterk vekst i næringslivet i Øygarden. Olje- og gassindustrien har lenge vore viktig for utviklinga, og industriområda på Ågotnes, Stura og Kollsnes er viktige fyrtårn i vekstkommunen i vest. Fiskeri og havbruk er også store næringar i kommunen og bidreg til berekraftig forvaltning av naturressursane.

Øygarden er den nest største kommunen i Vestland fylke med om lag 39 400 innbyggjarar. Det er rundt 12 500 arbeidsplassar i Øygarden. Dei fleste arbeider innan olje- og gass og annan industri. Andre viktige næringar er handel, service, fiskeri og havbruk. Arbeidsplassane i Øygarden finn vi både blant dei mange små og mellomstore bedriftene og dei store industriaktørane. I kommunen er det fleire store industriområde med mange arbeidsplassar og sterke fagmiljø.

Arbeidet med det nye sotrasambandet er i full gang. Dette står klar til bruk om fire år og vil verta eit stort løft for infrastrukturen og vidare vekst. Vi arbeider for å skapa mange nye arbeidsplassar og utvikla gode tilbod for dei som bur her. Det skal vera attraktivt å arbeida og bu i Øygarden, seier ordførar Tom Georg Indrevik.

I 2022 vedtok kommunestyret samfunnsdelen til kommuneplanen. Planen byggjer på bærekraftmåla til FN. Utfordringane framover må løysast med samarbeid.

– I planen understrekar vi at samarbeidet må skje på tvers av fagområde og bransjar og stimulera til nye teknologiske og klimakloke løysingar. Ambisjonen er at Øygarden skal vera eit utstillingsvindauga i det grøne skiftet. Vi har sterke aktørar lokalt, nasjonalt og internasjonalt som vil bidra til å nå dette målet, seier ordføraren.

Samarbeider med næringslivet

Hanne Misje Lokøy er dagleg leiar i Øygarden næringsutvikling KF. Dette kommunale selskapet skal stimulera og leggja til rette for både privat og offentleg næring i Øygarden kommune. 

Selskapet skal bidra til at det vert etablert nye arbeidsplassar i regionen og samstundes sikra gode vilkår for det eksisterande næringslivet.

– Mange næringsaktørar ønskjer å etablera seg i kommunen vår. Interessa har auka på etter at arbeidet med Sotrasambandet er i full gang. Vi samarbeider med lokalt næringsliv og regionale og nasjonale forskingsmiljø for å utvikla berekraftige arbeidsplassar. Dei siste åra har vi jobba tett med ulike næringslivsorganisasjonar og klynger for å stimulera til denne veksten og nå dei måla vi har sett oss, seier Misje Lokøy.

Hanne Misje Lokøy

Dagleg leiar i Øygarden næringsutvikling KF

Øygarden kommune skal vera ein strategisk tilretteleggjar for at næringar kopla til olje- og gassindustrien rettar seg mot nye og innovative moglegheiter i det grøne skiftet. Kommunen skal leggja til rette for å etablera fleire grøne aktørar innan energi, blått hav og sirkulærøkonomi i eksisterande og nye næringsområde.

Dette klarer vi å få gjennomført i eit tett og godt samarbeid med både store og små næringsaktørar, seier den daglege leiaren av Øygarden næringsutvikling.

Skrevet av: Vigleik Brekke – Kommunikasjonsleder i Øygarden kommune